Azərbaycan qədim adət-ənənələri olan, sənətkarlığı, tarixi və təbii gözəllikləri olan bir diyardır.

Bu cür zəngin təbiəti və mədəniyyəti olan bir ölkənin vətəndaşı olmaqdan qürur duyuram. İstər Bakı, istərsə də digər bölgələrimizdə hələ də kəşf olunmamış yerlər var. Seçdiyiniz bələdçinin münasibəti sizin səfərinizin uğurlu keçməsinə böyük təsiri olacaqdır.

2010-cu ildən etibarən turizm bələdçisi olaraq özümü yetişdirmişəm. Artıq 2011-ci ildən etibarən WFTGA (Beynəlxalq Turizm Bələdçiləri Assosiasiyaları Federasiyası) tərəfindən “Beynəlxalq Bələdçi” təlimlərini Tbilisidə başa vuraraq, ölkəmizdə ilk beynəlxalq bələdçi sertifikatına yiyələnmişəm.

Mən peşəmin vurğunuyam. 2012-ci ildən etibarən bir sıra bölgələrdə bələdçilərin yetişdirilməsi üçün bir sıra təlimlər verməklə yanaşı, ATMU-da (Azərbaycan Turizm və Menecment Universiteti) tələbələrə “Bələdçilik və turizm marşrutlarının” hazırlanması üzrə dərsləri tədris etmişəm.

Bələdçi olmaq, ölkənin mədəniyyətini, tarixini və reallıqlarını səfər edən insanlara elə bir formada çatdırmaqdır ki, həm ölkənin imici yüksəlsin, həm də qonaq məmnun qalaraq ölkəyə bird aha səfər etmək istəsin. Odur ki, bələdçi – strateji bir peşədir, bələdçilik – missiyadır. Biz bu missiya üçün ATGA (Azərbaycan Turizm Bələdçiləri Ass.) ətrafında toplaşmışıq.

Bütün həmkarlarıma yeni yolumuzda uğurlar diləyirəm.