Mən Orxan Cəfərov Azərbaycan Turizm Bələdçiləri Assosiasiyasının şəhadətnaməli bələdçisiyəm. Azərbaycanda və Ruminiyada Turizm və otelçilik ixtisası üzrə ali təhsil almışam. Turizm sahəsində 9 il iş təcrübəm var. Hazırda Naxçıvan Muxtar Respublikasının Turizm Departamentinin Turizmin inkişafı və təbliği sektorunda aparıcı məsləhətçi vəzifəsində çalışıram. 
Əlverişli coğrafi mövqeyi, özünəməxsus iqlimi, fauna və florası, milli mətbəxi, mineral və müalicəvi əhəmiyyətli su mənbələri, qədim tarixə malik memarlıq abidələri – “Xan Sarayı” Dövlət Tarix-Memarlıq, Mömünə Xatın və Açıq Səma Altında Muzey Kompleksi, Yusif Küseyir oğlu, Gülüstan türbələri, Qarabağlar türbə kompleksi, tarixi yaddaşı özündə əks etdirən qədim insanların ilk məskunlaşdığı Gəmiqaya abidəsi, bu yerlərin əzəmətinin və məğlubedilməzliyinin simvolu olan Əlincəqala, möhtəşəmliyi ilə seçilən Haçadağ, Göy-göl, “Əshabi-Kəhf Ziyarətgahı” Dini-Mədəni Abidə Kompleksi və yüzlərlə sənət əsərləri ilə zəngin Nuh diyarı Naxçıvanı, onun turizm potensialını yerli və xarici turistlərə tanıtmağa hazıram. Bu məqsədlə turistlərə azərbaycan, türk və ingilis dillərində düzgün, obyektiv məlumatları onları yormadan maraqlı şəkildə çatdırmağa üstünlük verirəm.