Mən Ramin Bəhmənli Nurəddin oğlu Qarabağın ürəyi Ağdam şəhərindənəm. 1996-cı il Noyabrın 15-də Ərəb-1 çadır şəhərciyində doğulmuşam.Hazırda Ağdamda bələdçilik edirəm. O Ağdam ki, görmədən sevdiyim, tarixini öyrəndiyim, 24 yaşıma qədər hara olduğunu bilmədiyim şəhər. Ağdam Qarabağın tam olaraq ürəyində yerləşir. Şəhər tarix boyu müxtəlif dövrlərdə, müxtəlif hakimiyyətlər altında mərkəz rolu oynayıb. Əsrarəngiz təbiəti ilə yanaşı eramızdan əvvəllərə aid tarixi yaşayış məntəqələri və tarixi abidələri ilə şəhər Qafqazda xüsusi əhəmiyyətə malik olub. Mən Ağdama gələn qonaqlara şəhərin tarixi abidələri, bir neçə dövrə aid tarixi məkanları, strateji yolları və təbiəti haqqında məlumat verməklə yanaşı bu ərazinin və ümumilikdə Qarabağın 29 illik işğalı müddətdə məruz qaldığı vandalizm faktları barəsində məlumatlar verirəm. Qarabağın və Ağdamın tarixini və təbiətini öyrənmək üçün sizləri Qafqazın cənnəti Qarabağa dəvət edirəm.